សន្និសីទចក្ខុវិស័យ
ប្រទេសកម្ពុជាឆ្នាំ២០២៥

ស្តីពីយុទ្ធសាស្រ្តកំណើនថ្មីរបស់ប្រទេសកម្ពុជា៖ អាទិភាពសម្រាប់ការអភិវឌ្ឍប្រកបដោយគុណភាពខ្ពស់ និងនិរន្តរភាព

០៤ ខែមីនា ឆ្នាំ២០២៥

សណ្ឋាគារសុខាភ្នំពេញ និងរ៉េស៊ីដង់ រាជធានីភ្នំពេញ

ទិដ្ឋភាពសេដ្ឋកិច្ច និងនយោបាយពិភពលោក ស្ថិតក្នុងស្ថានភាពប្រែប្រួលខ្លាំង ដែលកត់សម្គាល់ដោយភាពតានតឹងខាងភូមិសាស្ត្រនយោបាយ ការកើនឡើងនៃប្លុកអំណាចក្នុងតំបន់ ការថយចុះទំនុកចិត្តលើស្ថាប័នពហុភាគី បរិវត្តកម្មឌីជីថលយ៉ាងឆាប់រហ័ស និងការរាលដាលភាពបន្ទាន់នៃចីរភាពបរិស្ថាន។ ជវភាពទាំងនេះ បង្កើតបានទាំងបញ្ហាប្រឈម និងឱកាសនានាសម្រាប់ប្រទេសកម្ពុជា។ ដូចប្រទេសដទៃទៀតដែរ ប្រទេសកម្ពុជាត្រូវរិះរកដំណោះស្រាយ ចំពោះបរិយាកាសសកលដែលកាន់តែស្មុគស្មាញ និងពិបាកប៉ាន់ស្មាន។ ការចាប់យកឱកាសដើម្បីសម្រេចបានចក្ខុវិស័យរបស់ប្រទេសកម្ពុជាក្នុងការប្រែក្លាយជាប្រទេសមានសេដ្ឋកិច្ចដ៏រស់រវើក ជឿនលឿន និងមានភាពធន់ ដូចមានបញ្ជាក់នៅក្នុងយុទ្ធសាស្ត្របញ្ចកោណរបស់រាជរដ្ឋាភិបាល ទាមទារឱ្យមានគោលនយោបាយ និងយុទ្ធសាស្ត្រកំណើនថ្មី ប្រកបដោយប្រសិទ្ធភាព ដើម្បីកាត់បន្ថយការរំខាននានាដែលអាចកើតមាន។ សន្និសីទឆ្នាំនេះ នឹងវាយតម្លៃសមិទ្ធកម្មសេដ្ឋកិច្ចរបស់កម្ពុជានាពេលបច្ចុប្បន្ន និងធ្វើការពិភាក្សាអំពីទិដ្ឋភាពគន្លឹះ និងយុទ្ធសាស្ត្រកំណើនថ្មី ដែលជួយឱ្យកម្ពុជាសម្រេចបាននូវកំណើនប្រកបដោយគុណភាពរយៈពេលវែង។ សន្និសីទនេះមានបំណងផ្ដល់នូវការសម្របសម្រួលកិច្ចសន្ទនា ក្នុងចំណោមអ្នកជំនាញល្បីៗ ដើម្បីយល់កាន់តែច្បាស់អំពីបញ្ហាប្រឈមដ៏ធ្ងន់ធ្ងរ និងឱកាសដែលមិនបានប្រើនានា ក្នុងការជួយដល់កម្ពុជាអនុវត្តកម្មវិធីកំណែទម្រង់ប្រកបដោយប្រសិទ្ធភាព ក្នុងបរិការណ៍ដែលពិបាកប៉ាន់ស្មានខ្លាំង ដែលអាចប៉ះពាល់ដល់គន្លងអភិវឌ្ឍន៍នាពេលអនាគតរបស់កម្ពុជា។

កម្មវិធី បង្ហាញពីចំណាប់អារម្មណ៍

0:54

ព្រឹត្តិការណ៍សំខាន់ៗ

សន្និសីទដ៏ពិសេសរបស់ CDRI នេះ នឹងមានការអញ្ជើញចូលរួមពីសំណាក់ថ្នាក់ដឹកនាំក្នុងស្រុក និងអន្តរជាតិចំនួនជាង ៥០០+ នាក់ មកពី រាជរដ្ឋាភិបាលថ្នាក់ជាតិ និងថ្នាក់ក្រោមជាតិ ដៃគូអភិវឌ្ឍន៍ វិស័យឯកជន ក្រុមអ្នកផ្តល់គំនិត ស្ថាប័នសិក្សា និងសង្គមស៊ីវិល ដើម្បីស្វែងយល់ពីប្រធានបទចំនួនបី លើខ្លឹមសារសំខាន់ៗដូចខាងក្រោម៖

វឌ្ឍនភាព និងទស្សនវិស័យអភិវឌ្ឍន៍របស់កម្ពុជា

វគ្គបើកកម្មវិធីនេះ នឹងពិនិត្យឡើងវិញនូវសមិទ្ធកម្មសេដ្ឋកិច្ចរបស់កម្ពុជា និងចក្ខុវិស័យរបស់ខ្លួនសម្រាប់កំណើនប្រកបដោយភាពធន់ ចីរភាព និងបរិយាបន្ន។ ការពិភាក្សានឹងត្រូវបានធ្វើឡើងជាមួយនឹងការធ្វើបទបង្ហាញពីការរកឃើញសំខាន់ៗពីការសិក្សារបស់វិទ្យាស្ថាន CDRI ស្តីពី «យុទ្ធសាស្ត្រកំណើនថ្មីរបស់កម្ពុជា» ដែលវិភាគនិន្នាការកំណើននាពេលកន្លងមក និងបច្ចុប្បន្ន កំណត់កត្តាជំរុញ និងឧបសគ្គសំខាន់ៗ និងគូសបញ្ជាក់អំពីយុទ្ធសាស្ត្រចាំបាច់ដើម្បីសម្រេចបាននូវវិបុលភាពរយៈពេលវែង។ វគ្គនេះក៏នឹងទាញយកការយល់ដឹងដ៏មានតម្លៃ និងមេរៀនពីឧត្តមានុវត្តសកលនិងតំបន់ ដើម្បីជាព័ត៌មានក្នុងការពង្រឹងវិធីសាស្រ្តអភិវឌ្ឍន៍របស់កម្ពុជា ដែលអាចឱ្យកម្ពុជាសម្របខ្លួន និងរីកចម្រើនបានក្នុងបរិបទពិភពលោកដែលកំពុងផ្លាស់ប្តូរយ៉ាងឆាប់រហ័ស។

បញ្ហាប្រឈមនៃរចនាសម្ព័ន្ធ និងរបៀបវារៈកំណែទម្រង់បន្ទាន់ សម្រាប់កំណើនរយៈពេលវែងដោយគុណភាព

វគ្គនេះនឹងពិភាក្សាអំពីបញ្ហាប្រឈមរចនាសម្ព័ន្ធដែលរារាំងមហិច្ឆតាសេដ្ឋកិច្ចរយៈពេលវែងរបស់កម្ពុជា និងលើកដំណោះស្រាយអំពីរបៀបវារៈកំណែទម្រង់បន្ទាន់ក្នុងការធ្វើកំណែទម្រង់ស្ថាប័ន និងអភិបាលកិច្ច ការអនុវត្តគោលនយោបាយ និងការសម្របសម្រួល ការអភិវឌ្ឍធនធានមនុស្សប្រកបដោយគុណភាព ការលើកកម្ពស់បរិយាកាសភស្តុភារកម្ម និងធុរកិច្ច ក៏ដូចជាការសម្របខ្លួនទៅនឹងបច្ចេកវិទ្យាឌីជីថល និងការប្រែប្រួលអាកាសធាតុ។

ការភ្ជាប់ចក្ខុវិស័យកំណើនថ្មីជាមួយនឹងការអនុវត្តគោលនយោបាយប្រកបដោយប្រសិទ្ធភាព

ដោយផ្អែកលើទស្សនៈនិងយុទ្ធសាស្ត្រដែលបានកំណត់នៅក្នុងវគ្គមុនៗ វគ្គចុងក្រោយនេះនឹងផ្តោតលើការភ្ជាប់មហិច្ឆតាកំណើនទៅនឹងសកម្មភាពគោលនយោបាយ និងយុទ្ធសាស្ត្រជាក់លាក់សម្រាប់ការអនុវត្ត និងការសម្របសម្រួលប្រកបដោយប្រសិទ្ធភាព។ កិច្ចពិភាក្សានេះនឹងសង្កត់ធ្ងន់លើតួនាទីសំខាន់របស់ក្រសួង និងអង្គភាពសំខាន់ៗក្នុងការជំរុញកំណែទម្រង់ឱ្យមានលក្ខណៈគ្រប់ជ្រុងជ្រោយ។